Nafarroako Osasun Publikoaren eta Lan Osasunaren Institutuak tigre eltxoa Foru Erkidegoan zaintzeak eta kontrolatzeak duen garrantzia aztertu du jardunaldi batean

Joan den urriaren 18an, Nafarroako Osasun Publikoaren eta Lan Osasunaren Institutuak, LIFE-IP NAdapta-CCren esparruan, Osasunaren C5.5 Ekintzak bere egoitzan antolatu zuen tigre eltxoaren zaintza eta kontrolari buruzko sarrera jardunaldia, udaletako ordezkariei, Nafarroako izurriteak kontrolatzeko enpresei eta interesa duten beste pertsona batzuei zuzendua. Jardunaldian zehar, ISPLNko Ingurumen Osasuneko Ataleko hainbat profesionalek eta udaletako eta enpresetako ordezkariek parte hartu zuten.

Marian Nuin ISPLNko zuzendari gerenteak inauguratu zuen jardunaldia. Ingurumenaren eta osasunaren arteko harremanak gero eta garrantzi handiagoa duela azpimarratu zuen, eta One Health (Osasun bakarra) ikuspegitik egindako lanaren garrantzia azpimarratu zuen. Lan horrek elkarrekin lotutako hiru esparruren (giza osasuna, animalien osasuna eta ingurumena) arteko abordatze bateratu eta globala definitu eta proposatzen du.

Lehenengo hitzaldia Teresa Ferrer ISPLNko Ingurumen Osasuneko Ataleko buruak eman zuen, eta gaia sartu zuen bektoreek transmititutako gaixotasunen egoeraz hitz eginez, eta tigre eltxoaren zaintzan Nafarroan egiten den lana kokatu zuen, giza osasunean, animalia-osasunean (abeltzaintzarekin lotuta) eta ingurumen-osasunean (klima-aldaketa eta basa-ingurunearen kudeaketa) eskumena duten unitate teknikoen artean koordinatutako eta integratutako lanaren garrantzia berriro azpimarratuz.

Jarraian, ISPLNko Ingurumen Osasuneko Ataleko teknikari Beatriz Agudok azadu zuen nola zaintzen den tigre eltxoa Nafarroan. Azken urteetako zaintzaren emaitzak ere azaldu zituen; izan ere, arrautzen eta eltxo helduen aurkikuntzak gero eta ohikoagoak dira, eta gero eta leku gehiagotan izaten dute eragina.

Bestalde, Elena San Miguel Nafarroako Nekazaritzako Elikagaien Laborategiko atalburuak tigre eltxoaren laginak eta erabilitako teknikak identifikatzeko egiten duten lana azaldu zuen. Bektoreek transmititutako beste gaixotasun batzuekin lotuta egiten dituzten beste lan batzuk ere azaldu zituen.

LIFE-IP NAdapta-CCn kokatutako zaintza

Ondoren, Isaías Bautista Landa Garapen eta Ingurumen Departamentuko Europako Proiektuen eta Tokiko Iraunkortasunaren Ataleko buruaren txanda izan zen. Hark LIFE-IP NAdapta-CC aurkeztu zuen Nafarroan klima-aldaketara egokitzeko estrategia integratu gisa, eta tigre eltxoaren monitorizazio- eta zaintza-lana proiektuaren barruan kokatu zuen, eta klima-aldaketa eta One Health zeharka eta integratuta lantzearen garrantzia nabarmendu zuen. Gainera, nabarmendu zuen proiektuari esker gai horiei buruzko elkarrizketak izaten direla Nafarroako Gobernuko unitate teknikoen artean.

Berako alkate Aitor Elexpuruk azaldu zuen udalek nola bizi izan duten egoera tigre eltxoarekin bere herrian, intsektu horren presentziak gehien kaltetu duen herrian. Ildo horretan, herritarrak pedagogiaren eta informazioaren bidez kontzientziatzearen garrantzia adierazi zuen, eta eskerrak eman zizkion Ingurumen Osasuneko Atalari une oro izan duten koordinazio eta komunikazio onagatik.

Enpresen ordezkaritza-txandan, Isaac Antonio Garcíak, Rentokileko bektoreen kontrol-arduradunak, tigre eltxoaren udal-kudeaketaren ikuspegi holistikoa azaldu zuen, alderdi administratiboa, eta beharrezko langileak eta ekipoak azalduz. Gainera, hezkuntza publikoaren eta kontzientziazio kanpainen garrantzia azpimarratu zuen.

Bestalde, Eusebio de las Heras Naturalia Naturaleza Urbana SAko arduradun teknikoak tigre-eltxoaren kudeaketa azaldu zuen udaletatik, egoeraren diagnostikoaren, jarduketa-programaren eta ebaluazioaren etapak bereiziz.

Jardunaldia amaitzeko, Jorge Galván ANECPLA Ingurumen Osasuneko Enpresen Elkarte Nazionaleko zuzendari nagusiak egiten duten lana azaldu zuen, eta azpimarratu zuen garrantzitsuena eta arreta izurriteen kudeaketa integratuan jarri behar dena prebentzioa dela.

LIFE-IP NAdapta-CC proiektuari buruzko informazio guztia jakin nahi baduzu, albisteen hileroko buletinean harpidetu zaitezke formulario hau betez.