Maria Chivite Nafarroako presidenteak Klimaren eta Energiaren aldeko Europako Alkatetzen Itunarekin Nafarroako udalerriek duten konpromisoa nabarmendu nahi izan du bideo baten bidez. Bertan, Chivitek aurreratu du, itunari esker, “Nafarroako 205 udalek tokiko ekintza klimatikoarekin konpromisoa dutela”. Zifra horiek Nafarroako udalen herena eta “Foru Komunitateko biztanleen % 86 dira”, gogorarazi duenez.

Eta nabarmendu du 205 udal horietatik “156k dagoeneko egin dutela Klimarako eta Energia Iraunkorrerako Ekintza Plana”, egokitzapen, arintze eta pobrezia energetikoaren aurkako neurriak biltzen dituena.

Alkatetzen Itunak, presidentearen hitzetan, “metodologia bideragarri bat eskaintzea ahalbidetu du, tamaina eta ezaugarri desberdineko udalerriek beren tokiko ibilbide-orria izan dezaten”.

LIFE-IP Nadapta-CCrekin lerrokatuta

Chiviteren ustez, plan konprometitua eta koherentea da Europako klima-helburuekin, eta “LIFE-IP NAdapta-CCrekin lerrokatuta dago, Nafarroan klima-aldaketara egokitzeko garatzen ditugun neurri guztiak biltzen dituen proiektu europarrarekin”.

Alkatetzen Itunak udal-politiken mobilizazio eta berrikuntza garrantzitsua ekarri du, eta haren aplikazioa “bultzada bat da garapen iraunkorreko helburuak betetzeko eta tokiko ikuspegitik ekonomia berdeago baterantz jotzeko”, Nafarroako presidenteak bideoan ondorioztatu duenez.

LIFE-IP NAdapta-CC proiektuari buruzko gaurkotasun osoa ezagutu nahi baduzu, hileroko albiste-buletinera harpidetu zaitezke formulario honen bitartez.