Nafarroako Gobernuak foru agindu aitzindari bat onartu du energia-komunitateak sustatzeko

Mikel Irujo Garapen Ekonomiko eta Enpresarialeko kontseilariak berriki onartu du 64/2022 Foru Agindua, Nafarroan komunitate energetikoak sustatzeko neurriak ezartzen dituena. Horrela, bada, eskualdea herritarren parte hartzea eta energia berriztagarrien sorkuntzan parte hartzea sustatzen duten figura juridiko horiek arautzen dituen lehen autonomia-erkidegoa da.

Foru Aginduak Europako egungo araudia hartzen du oinarritzat arlo horretan, eta, besteak beste, "Nafarroako Energia-Komunitateei Laguntzeko Bulegoa" eta “Energia Komunitateen Erregistroa” sortzea aurreikusten du. Gainera, Nafarroako Gobernuak konpromisoa hartzen du energia erkidegoentzako dirulaguntzen deialdiak onartzeko.
 

Era berean, Foru Aginduak energía-komunitateetan kontsumitzaile kalteberen parte-hartzean jartzen du arreta, eta pobrezia energetikoaren aurkako neurriak hartzera behartzen du, betiere Administrazio Publikoren bat energía-komunitate baten parte bada.

Foru-agindu honen proposamena 2022ko otsailean aurkeztu zuen Irujo kontseilariak berak, eta partaidetza-prozesu baten pean jarri da. Prozesu horretan, herritarrek eta interesa duten eragileek haren edukiari buruzko beren ikuspegia eman ahal izan dute.

Energia-komunitateei laguntzeko jarduerak

Orain arte, Nafarroako Gobernuak energia-komunitateei laguntzeko hainbat jarduera egin ditu. Alde batetik, NASUVINSAk, LIFE-IP NAdapta-CC programaren esparruan, C6.7 ekintzan, komunitate energetikoen egoerari buruzko benchmarking-azterlana egin zuen, horiek garatzeko izandako zailtasunen zerrenda barne. Gainera, Nafarroan energia-komunitateak eratzeko lege-gida bat egin da, estatutuen ereduaren eranskin bat jasotzen duena.

Era berean, Nafarroako Gobernuak Energia Komunitateen Europako lehen Kongresua antolatu zuen. Azkenik, Gobernua izan zen toki-erakundeentzako laguntzak argitaratu zituen lehen autonomia-erkidegoa, energia-komunitatearen prestakuntza-prozesua diruz laguntzeko.

Energia-komunitateen figura

Energia-komunitateak finantza-errentagarritasunik bilatzen ez duten erakundeak dira; kontsumitzaileek energia-sisteman aktiboki parte hartzea bultzatzeko eta errazteko eta energiaren kudeaketa hobetzeko eratzen dira, kideen parte-hartze irekian eta borondatezkoan oinarritutako gobernantzaren bidez. Era berean, lurraldearekin lotura duten bazkideek kontrolatzen dituzte, eta, beraz, ekartzen dituzten ingurumen-, ekonomia- eta gizarte-onurak zuzenean itzultzen dira sortzen diren ingurunera.

Eragin hori energia-sektoretik haratago doa; izan ere, klima-aldaketaren eta energia-pobreziaren aurkako borrokan laguntzen dute, eta komunitatean gizarte-hobekuntzak sustatzen dituzte; horregatik, figura bereziki interesgarria dira erronka demografikoa duten udalerrientzat. Lurraldetik hurbil daudenez, beren puntu sentikorrak eta eskaini ditzaketen abantailak ezagutzen dituzte, eta, aldi berean, tokiko jarduera dinamizatzen, enplegua sortzen eta biztanleria finkatzen laguntzen dute.

Energia-komunitateak NAdaptan

Aipatu bezala, LIFE-IP NAdapta-CC proiektuan, C6.7 ekintzaren bidez, Nafarroan energia-komunitateak sortzen laguntzeko lan bat egin da. Figura horren kasuan, trantsizio energetikoko ekintzez eta eredu energetikoaren egokitzapenaz ari gara. Ikuspegi orokorra da, eta klima-aldaketa arintzeari eta klima-aldaketara egokitzeari eragiten die. Tokiko energia-komunitateak bezalako eredu berritzaileen bidez pertsonen parte-hartzea ahalbidetzea, laguntzea edo bultzatzea funtsezkoa da gizartea klima-aldaketara egokitzeko.