LIFE-IP NAdapta-CCk Osasun arloan egiten duen lana aurkeztu du Espainiako Epidemiologia Elkartearen urteko bileran

LIFE-IP NAdapta-CCk, Nafarroako Osasun Publikoaren eta Lan Osasunaren Institutuaren (NOPLOI) bidez, berriki aurkeztu du Epidemiologiako Espainiako Elkartearen urteko bileran proiektu europarrak Osasun arloan egiten duen lana. Hitzaldia Donostian izan zen, eta ‘XXI. mendeko erronkak: ingurumena, aldaketa klimatikoa eta desberdintasun sozialak’ izan zuen leloa.

Ekitaldian, Europako proiektu integratuak bi hitzaldi aurkeztu zituen. Lehenik eta behin, Estrella Miqueleizek, Nafarroako Osasun Publikoaren eta Lan Osasunaren Institutuko (NOPLOI) LIFE-IP NAdapta-CCko osasun arloko arduradunak, Osasun arloan ekintza desberdinetan garatzen ari den lana eta erabilitako metodologia aurkeztu zituen. Ildo horretan, nabarmendu zuen proiektu europarra lagungarria izaten ari dela herritarrak oro har eta profesionalak klima-aldaketak osasunean dituen ondorioez jabetzeko. Eta ondorioztatu zuen LIFE-IP NAdapta-CC lankidetzan ari dela klima-aldaketak Nafarroako biztanleengan osasunean dituen ondorioetara egokitzeko.

Bestalde, Amelia Aguilar Lan Osasuneko Zerbitzuko prebentzio-teknikariak kanpoan jarduten duten 245 enpresa bisitatzeko kanpaina baten emaitzak aurkeztu zituen. Kanpaina hori C.5.2 ‘Lan-baldintzak eta klima-aldaketaren ondorioak zaintzea; muturreko tenperaturak langileen osasunean’ ekintzaren barruan egin zen. Kanpainaren emaitzek agerian uzten dute akatsak daudela estres termikoaren arriskua identifikatzean, baita ebaluazio ez-espezifikoak ere. Gainera, agerian geratu da tenperatura altuekiko kalteberak diren langileak daudela, behar bezala identifikatzen ez direnak eta, beraz, prebentzio-neurri espezifikorik ez dutenak.

LIFE-IP NAdapta-CC proiektuaren gaurkotasun osoa ezagutu nahi baduzu, hileroko albiste-buletinera harpidetu zaitezke formulario honen bitartez.