Nafarroako Pediatria Jardunaldietan LIFE-IP NApdata-CC proiektuaren ponentzia bat egin zen

Nafarroako Pediatriari buruzko XXIII. Jardunaldiak joan den azaroan egin ziren Iruñean, eta Estrella Miqueleiz Nafarroako Osasun Publikoaren eta Lan Osasunaren Institutuko (ISPLN) ordezkariak hitzaldi bat eman zuen, LIFE-IP NAdapta-CC proiektuaren esparruan osasun-arloan egindako lana azaltzeko.

 
Nafarroan ikusitako klima-aldaketei buruzko datuak eskainiz hasi zen ponentzia, adibidez, 1950etik tenperaturan izandako 1,3ºC-ko igoera, baita klima-aldaketak osasunarekin duen harremana ere. Horrekin batera, LIFE-IP NAdapta-CC proiektuaren osasun-arloak duen inpaktuez, eskura dagoen ebidentziaz eta lan-esparruaz hitz egin zen.

Jarraian, Osasunaren arloan egiten den lana laburbildu zen. Hasteko, muturreko tenperaturen eremuko lana azaldu zen, bai biztanleria orokorrean, bai langileengan egindakoa. Lan horiek garatzeko, ‘Gehiegizko tenperaturak osasunean dituen ondorioak prebenitzeko Plana’ erabili zen, eta bisita-kanpaina egin zen langileentzako estres termikoa izateko arriskua zuten 245 enpresatan.

Airearen kalitateari dagokionez, Nafarroako hiru klima-eremutan polen-mailak zaintzeko egiten den lana azaldu zen, baita pertsona kalteberenengana iristeko informazioa zabaltzeko lanak ere. Bestalde, Nafarroako herritarren artean kutsadura atmosferikoak osasunean duen eraginaren ebaluazioari buruzko azterlanaren emaitzak zabaldu ziren, eta kutsatzaileen mailak murrizteko arintze-lanak duen garrantzia azpimarratu zen, baita kutsadura atmosferikoak haien osasunean dituen ondorioak herritarren artean zabaltzeak duen garrantzia ere.

Sortzen ari diren arriskuei dagokienez, klima-aldaketarekin lotutako arrisku jakin batzuk (Campylobacter edo Legionella, esaterako) zaintzeko egiten den lana azaldu zen, proiektu horren esparruan eskuratutako ekipamenduen eta tekniken bidez.

Azkenik, Miqueleizek tigre eltxoaren zaintza-lana azaldu zuen, baita ezarritako prebentzio-neurriak eta eltxoari aurre egiten laguntzeko herritarrei emandako informazioa eta ziztada saihesteko aholkuak ere. Gainera, esteka honetan herritarren eskura dagoen informazio-diptiko baten argitaratzea aipatu zuen: https://lifenadapta.navarra.es/eu/web/lifenadapta/dokumentuen-biltegia/-/document_library/A0PbQJ8w0mQF/view/13772556