Iruñeak 2022ko Alkatetza Itunaren Topaketa Nazionala hartuko du azaroaren 30ean

2022ko Alkatetza Itunaren Topaketa Nazionala 2022ko azaroaren 30ean egingo da Iruñean. Ekitaldia Nafarroako Kongresu Jauregian eta Auditorioan, Baluarten, izango da, 8:30etatik aurrera, eta 16:30ean amaituko da. Alkatetzen Itunaren Bulegoak antolatuko du, Nafarroako Gobernuarekin batera, LIFE-IP NAdapta-CC proiektu integratuaren bidez, Lursarea – Nafarroako Lurralde eta Jasangarritasun Agentziarekin (NASUVINSA), eta Iruñeko Udalarekin batera. Izena emateko epea zabalik dago eta azaroaren 22an amaituko da.

Jardunaldi honen helburua da Alkatetzaren Itunaren helburuekin zerikusia duten Europako politikaren inguruko azken berrikuntzen berri ematea. Horrekin batera, Iruñeak eta Nafarroako eskualdeak klima-aldaketari buruzko politiketan izandako esperientziak eta lorpenak azalduko dira. Izan ere, Nafarroa da Ituneko eskualde arrakastatsuenetako bat, ia 200 udalerritan Itunaren konpromisoei atxikitzea bultzatu baitu eta horietako 154etan Klima eta Energia Jasangarriaren Ekintza Planak (PACES) idatzi eta abian jarri ditu.

Jardunaldian zehar bi mahai-inguruko egingo dira gaurkotasuneko gaiak azalduz eta eztabaidatuz, hala nola, “Udalerrien papera energia-krisian” eta “Klima-aldaketara egokitzeko tresnak”. Horri, azken solasaldi bat gehituko zaio, tokiko ekintza klimatikoari buruzko udal-esperientziak azaldu eta eztabaidatzeko.